Ikiganiro na Dr Kimonyo, umwe mu bandikiye Habyarimana ko ibibazo u Rwanda rufite bizamugaruka

Yanditswe na Ferdinand Maniraguha
Kuya 3 Gicurasi 2018 saa 01:54
Yasuwe :
4 0

Umwanditsi w’Ibitabo Dr. Jean Paul Kimonyo, Umujyanama wa Perezida Paul Kagame, ni umugabo wavukiye mu buhunzi mu Burundi, akurirayo ariko aza gushinga imizi muri politiki ubwo yayoboraga Ihuriro ry’Urubyiruko rw’Abanyarwanda baharaniraga impinduka, icyo gihe yigaga muri Kaminuza ya Dakar muri Sénégal mu 1989.

Dr Kimonyo yagiranye ikiganiro cyihariye na IGIHE ku bwanditsi bwe, anavuga ku ibaruwa ifunguye yigeze kwandikira Juvénal Habyarimana wayoboraga u Rwanda, amumenyesha ibibazo byugarije igihugu kandi ko bidakemuwe bishobora kumugiraho ingaruka.

Uyu mwanditsi yanditse ibitabo byibanda ku mateka y’u Rwanda birimo icyitwa ‘Rwanda: Un Génocide Populaire’ yasohoye mu 2008 ndetse n’ikindi aherutse gusohora ‘Rwanda demain! Une longue marche vers la transformation.’

IGIHE: Guhitamo kwandika ku mateka y’u Rwanda byakujemo bite?

Kimonyo: Navukiye hanze ndi impunzi. Numvaga mfite amatsiko yo kumenya amateka y’u Rwanda. Nabanje kwiga ibijyanye n’itangazamakuru nyuma njya mu bumenyi bwa politiki. Jenoside ibaye byarandenze. Icyankomerekeje kurusha ibindi ni uburyo abantu bapfuye.

Kwica byagiye biba mu mateka ariko ugasanga abantu baricwa n’udutsiko duteguye neza nk’abasirikare, inyeshyamba […] ariko kubona abantu benshi bicwa n’abandi bantu b’abaturanyi n’abavandimwe, byarandenze.

Ni nayo mpamvu Jenoside nayise ‘Genocide Populaire’, ntabwo benshi bishwe n’igisirikare, bishwe n’abandi baturage. Sinibanze ku myaka ya nyuma ya Jenoside, nashatse kureba mpereye kera.

IGIHE: Mu gitabo cyawe ‘Genocide Populaire’ wakoze ubushakashatsi kuri Jenoside i Butare na Kibuye, wasanze ho yaratewe n’iki?

Kimonyo: Abahezanguni bishe abo batabonaga ibintu kimwe bose mu minsi ya mbere. Byatumye nta bantu bavuguruza politiki ya Jenoside mu gihugu, leta itangira kuyinyanyagiza mu baturage. Jenoside yabaye igihugu kivuye mu bya demokarasi. Icyo gihe Leta ubwayo nta ngufu nyinshi yari ifite zo kwemeza abaturage gukora ibyo ishaka byose.

Nka Butare, Ishyaka MRND nta jambo rikomeye ryari rihafite. Aba MDR bafatanyije n’ibirara, nibo batangiye gusaba abandi bantu kwinjira muri Jenoside.

Impamvu ya kabiri byashobotse ni ubukene. Hari abantu bakoreshejwe binjira muri Jenoside ku mpamvu ya politiki gato kuko muri Butare nta rwangano hagati y’Abahutu n’Abatutsi rwari ruhari. Icyatumye abantu bemera kwinjira mu bwicanyi, ni inyungu babonagamo: Gusahura, kurya inka, gufata amasambu n’ibindi.

Umwanditsi w’Ibitabo Dr. Jean Paul Kimonyo, akaba n'Umujyanama wa Perezida Kagame

IGIHE: Mu 1989, hari ibaruwa ivugwa wandikiye Perezida Habyarimana mu nama ya Francophonie i Dakar, byagenze bite?

Kimonyo: Nkigera muri Sénégal, nasanze hari Ihuriro ry’Abanyeshuri b’Abanyarwanda rikora neza ariko ryibanda cyane ku bikorwa bisanzwe nko kwakira abantu, gusura no gufasha.

Hari itsinda ry’urubyiruko twari tuvuye i Bujumbura dufite andi matwara. Twavuze ko ihuriro ryagombye kureba by’umwihariko ikibazo cy’Abanyarwanda, twibaza amaherezo y’impunzi z’Abanyarwanda.

Twari tumaze umwaka tureba ku bibazo by’impunzi, twumva ngo Habyarimana aje muri Sénégal [mu nama ya Francophonie, ihuza ibihugu bikoresha Igifaransa]. Mbwira bagenzi banjye nti ‘aje aho turi, asubireyo gutyo! Tumwandikira ibaruwa ifunguye, tuyikwirakwiza mu binyamakuru byari byaje mu nama.

Iyo baruwa yagaragazaga ahazaza h’u Rwanda. Twaramubajije ngo ‘ariko wowe ushaka ko duhera hanze, ni nde ukwizeza ko igihe kitazagera wenda na we ukajya hanze?

Twanavugagamo irondamoko n’irondakarere byari mu gihugu, ruswa n’ubukene.

IGIHE: Mumaze gutanga iyo baruwa byabaguye amahoro?

Kimonyo: Njye n’undi mugabo twari kumwe baradufunze. Byamaze kuba, amahuriro menshi atangira kwandika amabaruwa kuri leta bavuga ko batuzi, ko tutari ibyihebe. Bamaze kutubaza neza baraturekura.

IGIHE: Nyuma ya Jenoside, kuki amahanga yafataga leta nshya nk’idashoboye?

Kimonyo: Bavugaga ko FPR idahagarariye Abanyarwanda benshi, ko ihagarariye igice cy’Abanyarwanda bake. Icya kabiri bashakaga ko FPR ikora imishyikirano n’abicanyi, FPR ikavuga ko bidashoboka.

Babonaga kandi ko igihugu cyasenyutse, bakumva ko nta bushobozi Abanyarwanda bafite bwo kugisana, bakumva ko aribo bafite ubushobozi kandi nk’imiryango itegamiye kuri Leta yumvaga ariyo ifite ubushobozi bwo kugera ku Banyarwanda bose, bakabona ko FPR itagera kuri bose.

Hari n’inama bakoze bashaka ko imiryango itegamiye kuri Leta iba nka Guverinoma ya kabiri kandi kiriya gihe iyo miryango yumvaga ko ifite ingufu nyinshi cyane kurusha iza Leta.

IGIHE: Ese mwe iyo mwarebaga u Rwanda nyuma ya 1994, mwizeraga ko rushobora kwiyubaka rukamera uko ruri ubu?

Kimonyo: Oya, benshi siko twabibonaga gusa abayoboke bari bafite ukwizera ko nubwo Jenoside yabaye, badakwiye gucika intege kuko umurongo wa FPR kuva igitangira kwari ukuzana impinduka nyayo mu Rwanda.Twari tubizi ko bizahinduka ariko tutazi ko byamera uko bimeze uyu munsi.

Mu 1998 habaye kongere za FPR zidasanzwe ziswe Kicukiro I na II, zigiwemo iki?

Kimonyo: Kicukiro I niyo Kongere ya mbere yari ibaye nyuma ya Jenoside kuko kuva muri Nyakanga 1994, bafashe icyemezo cyo kugenzura amashyaka ya politiki, yemererwa gukora gusa ku rwego rwa Biro politiki ariko iby’ubukangurambaga n’ibindi barabiciye.

Mu 1997 abakada ba FPR baragumutse, bamagana igice cyari kiyoboye FPR n’imikorere ya Guverinoma muri rusange. Bavugaga ko hari ibintu bya ruswa bikomeye, ikimenyane, kwitwaza ubuyobozi mu nyungu bwite n’ibindi byinshi [...] hari ibintu byo guteza cyamunara inzu z’abantu mu buryo budafututse, umusirikare akazana abarinzi be akagota ahantu hose […] Abakada barivumbuye bati ‘Ntabwo twatakaje miliyoni y’abantu, ntabwo bagenzi bacu bapfuye ku rugamba ngo dukore ibyo turi gukora’. Bati ‘urebye umururumba abantu bafite urenze n’ubutegetsi bwa Habyarimana’. Batangiye kwandika mu binyamakuru no kubivuga mu baturage.

Kongere yabaye muri Gashyantare 1998, ivugurura abayobozi, abo basanze barangiritse babashyira ku ruhande ariko nabwo kuva muri Gashyantare ntabwo babonye impinduka nyinshi. Barongeye bakomeza kwivumbura, FPR ifata umwanzuro wo kugira biro politiki yaguye mu Ukuboza 1998 (Kicukiro II). Byose bashyize ku meza, bati ‘ibyo mwandika, ibyo muvuga byose muzane mu nama tubivuge, tubirangize” nuko byagenze kandi kongere irangiye byaragaragaye ko ibintu bigiye guhinduka.

IGIHE: Ubumwe n’ubwiyunge ubona bugeze ku kihe kigero?

Kimonyo: Abanyarwanda ubu barahura batishishanya. Barahura icya mbere kiri mu mutwe atari ukureba ubwoko nk’uko byahoze. Kubona ko twabashije kugera kuri uru rwego, biratangaje cyane gusa ntitwavuga ko byashize burundu uretse ko n’impuguke zagiye zireba ibibazo nk’ibyo atari ku Rwanda gusa, zivuga ko impinduka nyayo ugomba gutegereza ikindi gisekuru (generation).

IGIHE: Haracyari abahakana bakanapfobya Jenoside yakorewe Abatutsi by’umwihariko hanze y’u Rwanda, birasaba iki ngo bicike?

Kimonyo: Ingufu za Guverinoma zigarukira cyane ku butaka bw’u Rwanda ariko urebye nka za Rwanda Day, hari ukuntu izo ngufu zagenda zikagera ku miryango y’Abanyarwanda iba hanze. Gusa bisaba ko mu Rwanda tudasinzira, kuko niba ho ibintu bikomeye ibyo hanze ntacyo byadutwara.

Hasigaye imyaka 32 ngo u Rwanda rugere ku cyerecyezo 2050, ni iki ubona rukwiye gushyira imbere ukurikije aho rwavuye?

Kimonyo: Kubera uburyo u Rwanda ruteye, ni agahugu gato, abaturage benshi, nta mabuye y’agaciro menshi. Ntabwo rero dukwiye kwiringira urwego rumwe gusa. Abantu bakwiye kwita ku nzego nyinshi nk’ubuhinzi bw’ikawa, inganda ariko hari n’ubukerarugendo buri gutera imbere […] hari ibyo guverinoma iri gukora kandi bizakemura ikibazo ariko icy’ingenzi ni urubyiruko. Uburezi, amahugurwa y’imyuga nabyo ni ingenzi.

IGIHE: Dusoza, ubona ari uwuhe umusanzu abanditsi, abahanzi bakwiye kugira mu iterambere ry’igihugu?

Impinduka mu gihugu ntabwo zireberwa mu gisekuru kimwe, akenshi zitangira gukomera mu gisekuru cya kabiri. Mu bafite inshingano zo kwigisha icyo gisekuru gishya, abanditsi barimo. Ntabwo Umunyarwanda muto akwiye kurebera ibintu hafi yumva ngo imihanda, internet [...] atazi aho bituruka.

Dr Kimonyo wafunzwe yitwa icyihebe azira kwandikira ibaruwa ifunguye Perezida Habyarimana

Ibaruwa Kimonyo yandikiye Perezida Habyarimana


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza