Kwamamaza

Waba waramenye umukobwa wayoboye ibiganiro muri Rwanda Day i San Francisco?

Yanditswe kuya 3-10-2016 saa 08:12' na IGIHE


Yitwa Gasabwa Keila, ni Umunyeshuri w’Umunyarwanda wiga mu Mujyi wa Sacramento muri Leta ya California muri Leta Zunze Ubumwe za Amerika. Muri Rwanda Day yabereye i San Fransisco kuwa 24 Nzeli 2016, ni we wayoboye ikiganiro cyavugaga ku ruhare rw’umuco mu iterambere.

Nyuma y’uko uyu mukobwa agaragaje ubuhanga budasanzwe ndetse no kuvuga ashize amanga mu kuyobora iki kiganiro, Umunyamakuru wa IGIHE yaramwegereye aganira nawe, maze adutangariza aho ubu buhanga abukomora.

Keila yiga ibijyanye n’ubumenyi bwa politiki muri Kaminuza iba mu Mujyi wa Sacramento aho ari kuva mu mwaka wa 2013 ubwo yageraga mu muri Amerika aje gutyaza ubwenge. Uyu Munyarwandakazi ukiri muto, yabwiye IGIHE ko nubwo yiga ibijyanye na politiki atari yarigeze na rimwe ayobora ibiganiro nk’ibi, ariko mu buzima bwe aka ba ari umukobwa utitinya kandi ukunda kwihagararaho.

Nubwo yari imbere y’abanyacyubahiro, Gasabwa ntibyamubujije kuyobora mu buryo bwashimwe na benshi ikiganiro cyavugaga ku ruhare rw’umuco mu iterambere cyari cyahuje intiti zo ku rwego mpuzamahanga harimo n’abayobozi bo mu rwego rwo hejuru mu Rwanda.

Imbere ya Pezida Kagame n’abandi banyacyubahiro, uyu mukobwa witegura gukomeza amasomo ye mu bijyanye n’amategeko mpuzamahanga, yayoboye iki kiganiro cyari kirimo Prof. Anastase Shyaka, Minisitiri Louise Mushikiwabo, Joseph Masengesho, ndetse n’abandi, aho yabahataga ibibazo akanabaha umwanyua mu kugaragaza ibitekerezo byabo ndetse no gusobanura byimbitse ibijyanye n’umuco.

Gasabwa Keila imbere y'ibihumbi byari byitabiriye Rwanda Day i San Francisco

Nubwo Gasabwa yiga ibijyanye na politiki, mu buzima bwe ngo akunda kandi yumva azakora ibijyanye n’ubushabitsi (Business) birimo kwihangira imirimo dore ko no kuri ubu ari umukozi muri banki ya Wells Fargo aho akora afasha ba rwiyemezamirimo bato n’abaciriritse (Small Business Banker).

Hari icyo yakuyemo

Gasabwa aganira na IGIHE yavuze ko hari byinshi yakuye muri ubu bunararibonye.

Yagize ati “Nyuma yo kugira aya mahirwe yo kuyobora iki kiganiro hari byinshi nungutse kuri njye mu bijyanye n’ubumenyi ndetse no kwigirira icyizere, nabonye ko urubyiruko dufite amahirwe adasanzwe kandi dufite byinshi twakora byateza imbere igihugu cyacu dushingiye ku muco duhuje, aho twe tuba mu mahanga ubumenyi duhaha dushobora ku bwifashisha tugateza u Rwanda imbere.”

Abajijwe n’umunyamakuru uko yiyizi mu buzima busanzwe yagize ati ”Ndi umuntu usanzwe udakunda kugaragara no kwigaragaza cyane, ariko kandi nkunda gukora kugira ngo ngere ku ntego nihaye, akenshi nibyo mpa igihe, nkunda guca bugufi kandi nkashyigikira ibitekerezo byose biganisha ku iterambere”.

Mbere y’uko yerekeza muri Leta Zunze Ubumwe za Amerika Gasabwa yabanje kwiga amashuri abanza n’ayisumbuye ku ishuri rya La Colombiere mu Murenge wa Kacyiru akomereza kuri Riviera High School i Kabuga. Agira inama urubyiruko yo gukora bashishikaye bagaharanira kwiteza imbere ndetse no guteza igihugu imbere hamwe no kugihesha ishema.

Yize muri La Colombiere no muri Riviera High School mbere yo kujya muri Leta Zunze Ubumwe za Amerika
Kuyobora ikiganiro muri Rwanda Day byatumye arushaho kwigirira icyizere

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved