Umunyarwanda mu basirikare b’indashyikirwa ba Canada

Yanditswe na Mukaneza M.Ange
Kuya 14 Werurwe 2018 saa 12:46
Yasuwe :
3 2

Kaporali Aimé Hirwa, Umunyarwanda ubarizwa mu Gisirikare cya Canada, yashyizwe ku rutonde rw’abasirikare ba Division ya Gatanu bagaragaza imbaraga no guhora biteguye guhangana n’imbogamizi zose bahura nazo.

Ni mu bukangurambaga bwiswe “Faces of the 5th Canadian Division” bugamije kugaragaza byinshi ku bagize ingabo za Canada zikorera mu gace ka Atlantic.

Hirwa wavukiye i Kigali mu Rwanda mu 1996, amaze imyaka ine ari muri Batayo ya mbere y’Umutwe w’Ingabo za Canada uzwi nka ‘The Royal Newfoundland Regiment.’

Nk’uko bigaragara ku rubuga rw’Igisirikare cya Canada, Hirwa yavuze ko ababyeyi be bakoze cyane ndetse bashakira abo bibarutse ubuzima bwiza, aribo bamubereye icyitegererezo.

Uyu musore avuga ko kujya mu Gisirikare cya Canada byamwunguye byinshi birimo guhura n’abantu benshi no kumenyera gukorera ahantu hafite imiterere itandukanye.

Yagize ati “Imwe mu nyungu nishimira kandi mpa agaciro cyane ni ukuba imyitozo nagakwiye kuba nishyura ngo mpabwe, nishyurwa ngo nyikore. Ikindi ni uko nkora ikintu gifite agaciro kandi cyisumbuyeho kuri njye ubwanjye, aho numva ko ariho nkwiye kuba koko.”

Hirwa wiga ibijyanye n’Ubumenyi mu Mitekerereze ya Muntu muri Memorial University avuga ko mu byamushimishije kuva yagera mu gisirikare ari ugutoranywa ngo yitabire ibirori bigenewe ingabo (Ceremonial Guard), byabereye mu Mujyi wa Ottawa. Avuga ko kandi yizeye kuziga amategeko, kugira ngo abe ari nabyo azakora mu ngabo za Canada.

Yanagarutse kandi ku kwezi kwahariwe amateka y’abirabura kwizihizwa muri Gashyantare mu bihugu birimo Canada, u Bwongereza na Leta Zunze Ubumwe za Amerika, avuga ko ari igihe gifite igisobanuro gikomeye kuri we, kuko ari umwanya utuma abakiri bato barushaho kumenya no gusobanukirwa ibihe bikomeye abirabura banyuzemo.

Ati “Biduha kandi amahirwe yo gusubiza amaso inyuma, no gushima intambwe yatewe, tukanasuzuma icyakorwa kugira ngo tugire umuryango mwiza, aho nta kintu na kimwe gishobora kudutanya.”

Mu kiganiro na The Gulf News, umubyeyi wa Hirwa, Philippe Basabose warokotse Jenoside yakorewe Abatutsi mu 1994 ariko igatwara abo mu muryango we barimo na se, yasobanuye inzira itoroshye banyuzemo, ndetse n’uburyo umwana we yaje kwinjira mu gisirikare.

Basabose ukuriye Ishami ry’Indimi n’Umuco muri Memorial University yavuze ko ubwo Hirwa yari afite imyaka 16 aribwo yagaragaje igitekerezo cyo kujya mu gisirikare, akemera kumushyigikira kuko yabonaga afite ubushake budasanzwe.

Basabose avuga ko amateka y’u Rwanda n’ubutwari bwa Lt. Gen. Romeo Dallaire wari uyoboye ingabo za Minuar mu gihe cya Jenoside, yagize amahirwe yo kuganira nawe, biri mu byatumye arushaho kubona agaciro ko kuba umwana we yajya mu gisirikare.

Akomeza avuga ko n’ubwo ibihe yabayemo mu Rwanda bitoroshye kubivuga, asanga ari ingenzi kubiganira n’abana be kuko n’ubwo ari amateka mabi, nabo ari ayabo.

Hirwa wabaye mu Rwanda nyuma ya Jenoside, dore ko ari nabwo yavutse, yahavuye mu 2012 asanze umubyeyi we muri Canada, avuga ko mu byo yibuka cyane harimo gahunda z’ubumwe n’ubwiyunge zakorwaga mu gihugu hose, zigamije gushishikariza Abanyarwanda kongera kubana mu mahoro.

Nubwo amateka y’u Rwanda nta ruhare runini yagize mu gutuma yinjira mu gisirikare, uko agenda arushaho kuyamenya, ndetse agasobanukirwa byinshi ku bijyanye n’ubutumwa bw’amahoro bituma yumva kurushaho ko kuba umusirikare yabikoresha mu kuzana impinduka nziza.

Kaporali Aimé Hirwa, Umunyarwanda ubarizwa mu gisirikare cya Canada

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza