00:00:00 IGIHE NETWORK KN KINYARWANDA EN ENGLISH FR FRANCAIS

Umuhungu wa Joe Habineza yavuye imuzi ibyaranze ubuzima bwa se (Video)

Yanditswe na Karirima A. Ngarambe
Kuya 26 Kanama 2021 saa 05:22
Yasuwe :
0 0

Jean Michel Habineza w’imyaka 33 y’amavuko, umuhungu w’imfura wa Ambasaderi Joseph Habineza, yasobanuye byinshi byerekeye ubuzima bw’umubyeyi we, agaruka kandi ku minsi ye ya nyuma n’urwibutso asigiye umuryango we n’inshuti ze.

Ni mu kiganiro yagiranye na IGIHE, aho ari muri Kenya ari na ho Amb. Joseph Habineza yatabarukiye ku wa 20 Kanama 2021, ku myaka 57 y’amavuko.

Jean Michel Habineza yagize ati “Ndabanza gushimira abantu benshi bakomeje kumuha umwanya mu bavuga uko bamukundaga, uko babanye, uko bakoranye, twebwe nk’umuryango dutangazwa cyane n’ukuntu ubuzima bwa Papa wacu bwakoze kuri benshi mu buryo butandukanye.”

“Kera najyaga ntangazwa no kujya ahantu, nababwira ko ndi umwana we bagahita bambwira ko ari inshuti yabo ibyo byambayeho kenshi cyane nkibaza ukuntu Papa akundwa cyangwa azwi n’abantu bose bikanyobera. Nyuma nagiye mbimenyera kuko natwe mu rugo twamwitaga umumararungu, ‘Papa Bonheur’ cyangwa ‘Cool Joe’.”

Jean Michel yakomeje agira ati “Abantu benshi baribaza ku rupfu rwa Papa. Yari amaze igihe akorera ‘business’ hagati ya Nigeria n’u Rwanda, urugero ni uko nk’umwaka ushize amezi menshi yayamaze muri Nigeria, yari ahafite imishinga myinshi kuko ni ahantu yabaye igihe kinini yafataga nk’igihugu cye cya kabiri."

"Hashize nk’amezi abiri yari mu Rwanda, afite gahunda yo kujya mu Burayi kureba inshuti biganye, aca muri Nigeria avuyeyo yagombaga no kujya mu nama y’akazi na murumuna we Jonas Habumuremyi i Nairobi."

"Muri iyo minsi akaba yari no kwizihiza isabukuru y’imyaka 33 amaranye na mama wacu, ariko kuko yari mu rugendo yashyize ifoto ya kera bizihiza isabukuru y’imyaka 30 bubatse ku mbuga nkoranyambaga ze, amwifuriza umunsi mwiza, natwe twari twasigaranye na we turawizihiza.”

Ubwo ageze kwa Murumuna we i Nairobi hari ku wa Kabiri ajya kuryama nk’uko bisanzwe ariko buri bucye bajya mu nama ku wa Gatatu guhera mu saa sita, ariko muri iryo joro yagize ya ‘crise’ ya ‘hypoglycémie-Diabète’, isukari iramanuka cyane, dutekereza ko kubera byabaye mu gicuku nta wigeze abimenya, murumuna we Jonas, mu gitondo aramwihorera ngo akomeze aruhuke kuko yari azi ko aryamye bisanzwe.

Nyuma bigeze nka saa tanu ni bwo yagiye kumukomangira ati “Byuka witegure tugende, arebye asanga undi ntameze neza ni bwo bahise bamujyana kwa muganga, abaganga bakora ibishoboka byose ariko iyo umunsi wageze umuntu nta kimugarura.

Dukeka ko twamubonye umubiri wamaze gucika intege ijoro ryose. Igitangaje cye rero muri uko kurwana n’ubuzima kwa muganga, iyo wamubazaga uko ameze akakumva yarakubwiraga akoresheje igikumwe ati ‘meze neza’ mbese kugeza ku munota wa nyuma yari agifite morale nk’iyo yahoranaga.”

Ambasaderi Habineza Joe asize umugore n’abana bane; abahungu batatu n’umukobwa umwe. Aba bavutse ari impanga inshuro ebyiri. Imfura zifite imyaka 33, abandi bafite imyaka 30. Bose baba mu Rwanda uretse umwe wiga mu Bushinwa.

Jean Michel yagarutse ku bijyanye n’uko se Amb. Habineza yamenyanye na nyina Justine Habineza bahuriye mu ishuri rya Saint Fidèle ku Gisenyi aho bigaga ibijyanye n’ikoranabuhanga (informatique) mu myaka ya 1985-1986.

Mu muryango w’iwabo, Amb. Habineza yari imfura mu bavandimwe batandatu uretse ko umwe yitabye Imana muri Jenoside yakorewe Abatutsi.

Uko yabaga ameze mu buzima bwo hanze no mu rugo ni ko yitwaraga

Jean Michel Habineza yavuze ko kuva mu buto bwe, se yari umuntu ugira umutima mwiza akamenya gufata abantu neza. Byatumaga mu bihugu byose aho yabaye ahagira inshuti. Ngo yakiraga abantu bose, akitaba telefone atarobanuye ku butoni.

Ati “Yaravuga ngo ubaha buri wese ariko ntugire uwo ugira upfukamira. Wabonaga ko abantu bose abubaha. Byari byoroshye kugira ngo umuntu abibone; yaba ari umukozi wo mu rugo, umushoferi, umusekirite; yarabubahaga ukabona ko atari ibintu byo guhatiriza ahubwo bimurimo.”

“Ndibuka ko umunsi aba Minisitiri yatwicaje aratubwira ngo ‘aho mwagendaga n’amaguru murakomeza muhagende n’amaguru, inshuti zanyu murakomeza mube inshuti na zo. Ibyo mwakoraga ntabwo bihinduka.Ibi ni ibyanjye (guhabwa inshingano nka Minisitiri), si ibyanyu’. Ariko na we ni uko yagumye ntiyigeze ahinduka.”

Bimwe mu byo Michel Habineza yakundiraga se ni ukuba haba igihe yabaga ari kumwe n’abayobozi bakomeye ku isi cyangwa abaturage, ahantu hose atari umuntu uhindagurika, akarangwa no gutebya igihe yabaga ari mu rugo, afite ibyishimimo byo kubaho.

Amb. Habineza ngo yahoraga ashaka gukora ibintu bikomeye kandi akabyigisha abana be hamwe no kugira intego, guhanga ibintu bishya, bitera imbere, bishobora kuzana impinduka mu buzima bw’abantu benshi.

Ijambo amwibukiraho cyane, ni iryo yamubwiye asoje amashuri yisumbuye, ati “Mwana wanjye uzakore cyane ukiri muto nubwo wakwinjiza amafaranga make kuko numara kugera ku rwego nk’urwanjye uzaba ukora bike biguha amafaranga menshi."

"N’ubu ndacyabyibuka, iyo nama yampaye ni yo yahinduye ibintu byinshi nakoze mu myaka yanjye 20. Ariko hari n’ikindi kintu ari cyo gukora cyane no kwishima cyane. Yaravuga ngo nudakora cyane uzicwa n’inzara ariko nutishima na bwo uzicwa n’agahinda. Ngo byose ni ukubishyira ku gipimo ni magirirane.”

Ibijyanye no gushyingura

Jean Michel Habineza, yavuze ko hateganyijwe umuhango wo gusezera ku murambo i Nairobi muri Kenya, kuri uyu wa Kane tariki ya 26 Kanama 2021.

Ku wa Gatanu umurambo uzagezwa i Kigali maze ku wa Gatandatu tariki ya 28 Kanama habeho igitaramo cyo kumusezeraho.

Gushyingura biteganyijwe ku wa Mbere tariki 30 Kanama i Rusororo saa cyenda.

Kubera ibihe by’icyorezo cya Covid-19 bituma abantu batemererwa guhurira hamwe ari benshi, hazashyirwaho umuyoboro bazakurikiraniraho umuhango mu buryo bw’ikoranabuhanga.

Ambasaderi Habineza Joe yitabye Imana ku wa 20 Kanama 2021
Ambasaderi Habineza n'umugore we babyaye abana b'impanga inshuro ebyiri
Jean Michel Habineza yavuze ko kuva mu buto bwe, se yari umuntu ugira umutima mwiza akamenya gufata abantu neza
Ambasaderi Joe Habineza, umugore we n'abana babo uko ari bane
Mu mibereho ye uko yitwaraga mu buzima bwo hanze ngo ni ko yabaga ameze no mu muryango we

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .