Kwamamaza

Twitege iki ku mutekano wa John Kerry utegerejwe i Kigali?

Yanditswe kuya 13-10-2016 saa 08:47' na Rabbi Malo Umucunguzi


Umunyamabanga wa Leta Zunze Ubumwe za Amerika Ushinzwe Ububanyi n’Amahanga, John Kerry, ategerejwe i Kigali mu nama yiga ku ivugurura ry’amasezerano ku ikumirwa ry’imyuka yangiza akayunguruzo k’izuba, iri kubera mu Rwanda kuva kuwa 10 kugeza kuwa 14 Ukwakira.

Kerry afite umwanya ukomeye muri ine ya mbere muri Amerika, akaba yari umusirikare mu ngabo zirwanira mu mazi afite ipeti rya Lieutenant, ndetse yarwanye intambara ya Vietnam.

Ni Umunyamabanga wa Leta wa 68 Ushinzwe Ububanyi n’Amahanga. Yarahiriye uyu mwanya kuwa 01 gashyantare 2013.

Umutekano we urarinzwe

Umutekano w’Umunyamabanga wa Leta Zunze Ubumwe za Amerika Ushinzwe Ububanyi n’Amahanga, ucungwa n’umutwe wihariye, U.S. Diplomatic Security Service (DSS cyangwa DS), ari nayo ishinzwe guhiga no guta muri yombi ababeshya inzego z’abinjira n’abashoboka, gusuzuma ibibazo by’umutekano, ibyaha by’ikoranabuhanga, kurwanya iterabwoba no kurinda abayobozi bakomeye basura Amerika.

Uyu mutwe wa DSS niwo mutwe wa Leta Zunze Ubumwe za Amerika ufite abantu benshi bawuhagarariye mu bihugu byinshi, ukarinda ibikorwa bya za Ambasade n’abadipolomate ba Amerika mu bindi bihugu.

Ni urwego rushinzwe guharura amayira ya gahunda mpuzamahanga za Leta Zunze Ubumwe za Amerika, ndetse igikorwa cyose cy’abategetsi ba Amerika gikorwa hubahirijwe amabwiriza y’uyu mutwe.

Ni umutwe wihariye

Wambara gisivili nk’abandi banyacyubahiro, gusa bakoresha imbunda nini mu kazi kabo, bakagira imyitwarire yihariye, n’izina bahuriraho “Special Agents.’’

Amerika ubwayo yiyemerera ko DSS ikorera mu mijyi 31 muri Amerika n’ibihugu 160 ku Isi, hagamijwe ko ikora gahunda zayo nta nkomyi. Uyu munsi bakora uburinzi bw’ubutumwa bwa Amerika busaga 275 ku Isi, bakusanya amakuru y’ibanga, baneka mu nyandiko zo kujya mu mahanga n’ibikorwa by’iterabwoba.

Ni wo mutwe warinze John Kerry ubwo aheruka muri Kenya na Somalia ibihugu byari byugarijwe na Al Shabaab, ndetse banacunga uwa Obama n’abadipolomate basaga 300 bari baturutse muri Amerika bitabiriye inama ya Global Entrepreneurship Summit.

Ubwo John Kerry yageraga muri Kenya

Mbere y’uko John Kerry na Obama bagera muri Kenya, abasirikare ba DSS 45 bagabanyije mu matsinda arindwi, babanje gukorana imyitozo n’abasirikare badasanzwe ba Kenya, banarinda Abanyamerika 300 ku buso bwa kilometero 80.4 bifashishije imodoka 192 mu kubatwara kuri hoteli 13, inyubako z’Umuryango w’Abibumbye na Kenyatta International Convention Center.

Icyo gihe hari hashyizwe kamera zidasanzwe mu Mujyi wa Nairobi n’amatara mu duce tutari tuyasanganwe, bikiyongera kuri radiyo 65 zari zashyizwe mu modoka zitandukanye mu Mujyi zigenzura itumanaho.

Nicyo gikorwa gihambaye cy’umutekano DSS ivuga ko cyaranze 2015, mu gice cya Kenya cyazahajwe na Al Shabaab, kimwe na Somalia bihana imbibi, byose bishoboka hifashishijwe ba “Special Agents” basaga 200.

Hari byinshi byakanguye Amerika ku mutekano w’abadipolomate

Amateka ya ‘Diplomatic Security Service’, atangirirwa mu 1916 n’ubwo icyo gihe witwaga “Bureau of Secret Intelligence”, ugenda uhindura imikorere bitewe n’ibibazo byihariye.

Kuwa 14 Gashyantare 1974, Adolph Dubs wari Ambasaderi wa Leta Zunze Ubumwe za Amerika muri Afghanistan yabyutse mu gitondo yerekeza ku kazi kuri Ambasade i Kabul.

Umugabo wiyambitse nk’umupolisi yahagaritse imodoka ye amubwira ko afite amabwiriza yo kuyisaka, ayinjiramo atunga imbunda umushoferi we, amutegeka kudahagarara kugeza ubwo we n’abandi bantu batatu bayinjiyemo.

Umushoferi bamutunze imbunda bamutegeka kwerekeza kuri hoteli iri i Kabul, ihagera ahagana 8:50. Basohoye Dubs mu modoka, bamujyana mu cyumba cya hoteli, umushoferi we ahabwa amabwiriza yo kujya kuri ambasade akamenyesha Abanyamerika ibibaye.

Abapolisi, abasirikare n’abakozi ba ambasade benshi bazengurutse iyo hoteli, abadipolomate batatu ba Amerika hamwe n’abandi bane b’Aba-soviet, batakambira abayobozi ba Afghanistan ngo barengere ubuzima bwa Ambasaderi Dubs.

Abo basoviet bane bagiranye ibiganiro n’abayobozi ba Afghanistan bisa n’aho ari abajyanama babo, birinda bigera 12:50 ubwo Ingabo za Afganistan zamennye urugi rw’icyumba yari yajyanywemo, basanga ambasaderi Dubs yarashwe kare.

Ishimutwa n’iyicwa rya Ambasaderi Dubs ryagaragaje ko hakenewe umutekano wihariye w’abadipolomate, bituma abayobozi b’Urwego Rushinzwe Ububanyi n’Amahanga bongera gusuzuma uko umutekano ucungwa.

Peter E. Bergin wayoboye DSS mu 1998 kugeza mu 2003, yigeze kugira ati “Hari abantu benshi batwanga, bikabanezeza, kandi biteguye gukora ikibi bashoboye icyo aricyo cyose, mu guhungabanya Leta Zunze Ubumwe za Amerika.”

Mu Mata 1983, Ambasade ya Amerika i Beirut yatewe igisasu n’umwiyahuzi, abantu 49 barahagwa naho 12o barakomereka, bisa n’ibibimburiye ibindi bikorwa byo kwibasira ibikorwa bya Amerika.

Mu Ugushyingo 1985, DSS nibwo yahawe iryo zina, hashyirwaho umuhigo ko ibyabaye kuri Amerika n’abadipolomate bayo bitazasubira ukundi, ubu ikaba ifite abasirikare b’abahanga bagera ku 12 000 bakorera ku Isi hose.

John Kerry ari kuvugira kuri telefoni mu modoka, abashinzwe umutekano hafi aho bacunze ko atagira icyo aba

Imyitozo yabo irahambaye

Ni itsinda rifite imyitozo yo kuburizamo igitero uko gisa kose, bakagira n’ibikoresho birimo imodoka z’imitamenwa zibafasha guhungisha abadipolomate bibaye ngombwa.

Kugira ngo umuntu yinjire muri DSS, hari itsinda ryita ku gushaka abasirikare bashya, hari ibizamini bikorwa n’imyitozo y’igihe kirekire, hamwe no kwihugura mu ndimi nyinshi bitewe n’aho abo basirikare bagiye gukorera.

Babanza gukorerwa ibizamini by’ubuzima, hagasuzumwa amateka y’uwo muntu, ndetse hakanasuzumwa ubushobozi harebwa niba ari ku rwego rwo guhagararira Leta Zunze Ubumwe za Amerika mu mahanga.

Abari muri DSS bose barangije kaminuza, ndetse hari n’abafite andi masomo ahambaye bagiye barenzaho.

Nyuma y’uko umuntu yinjiye muri DSS, ahabwa amezi icyenda y’imyitozo mu kugenza ibyaha, ndetse buri gihembwe bagakora isuzuma ryo kwifashisha intwaro, bakanakorera mu gihugu nibura amezi atatu mbere y’uko boherezwa mu mahanga.

Bahabwa imyitozo ituma baba abasirikare bihariye mu mezi icyenda, bakigishwa ibibazo by’amahanga mu mezi atatu, guhangana n’ibintu bikomeye mu byumweru 12, kwihugura mu ndimi mu byumweru bibiri, bakongeraho iminsi yo gutegura ibisasu.

Nyuma yo kwakira abaperezida basaga 35 ba Afurika, Minisitiri w’Intebe wa Israel, Benjamin Netanyahu n’abandi, u Rwanda yaba ingabo na Polisi bagaragaje ubuhanga mu kurinda umutekano, aho nta n’umwe muri aba bayobozi wigeze agira ikibazo, ahubwo batashye barata umutekano w’u Rwanda ku buryo umutekano wa John Kerry ushobora kudakazwa nk’ahandi.

Aba Special Agents baba bambaye nk'abasivili
Abarinda Kerry baba bafite ibikoresho bihambaye

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved