Nyirahabineza warokotse Jenoside ntiyashatse na rimwe umugabo, yihitiyemo kurera imfubyi

Yanditswe na Emma-Marie Umurerwa
Kuya 16 Mata 2018 saa 12:30
Yasuwe :
0 0

Nyirahabineza Mathilde yabaye imfubyi guhera mu 1980 arererwa muri SOS nyuma ya Jenoside yakorewe Abatutsi na we yitangiye kurera izindi mfubyi zirimo n’izarokotse Jenoside yakorewe Abatutsi 1994.

Ababyeyi ba Nyirahabineza Mathilde bishwe n’indwara mu 1980 ubwo yari afite imyaka 12 y’amavuko, hamwe n’umuvandimwe we baza kurererwa mu kigo cy’imfubyi cya SOS Rwanda ku Kacyiru.

Muri Jenoside yakorewe Abatutsi mu 1994 umuvandimwe we yarishwe, Nyirahabineza agira amahirwe yo kurokorwa n’Inkotanyi zamuhungishirije mu bitaro byitiriwe Umwami Faisal atangira kurera izindi mfubyi kuva ubwo kugeza ubu.

Nyirahabineza yabwiye IGIHE ko uburyo ubuzima bwe bwashaririye kurushaho muri jenoside, ubwo bamwe mu bana bareranwe n’umuvandimwe we bicwaga .

Yagize ati “Jenoside yabaye maze nk’ukwezi SOS incukije njya kuba hanze kuko nari narize imyuga ntangira kwikorera. Noneho itangiye mpita ngaruka mu kigo ni naho narokokeye nkaba maze kurera imfubyi zigera kuri 40 guhera 1994.”

Yakomeje agira ati “Ikintera intimba ku mutima ni abana twareranywe hamwe n’umuvandimwe wanjye bishwe n’Interahamwe. Ni ibintu bimbabaza cyane sinabasha kubigusobanurira.”

Akomeza avuga ko muri Nzeri 1995 aribwo yatangiye kurera imfubyi muri SOS.

Ati“Umuryango nari narawubuze mbere, Jenoside nayo yatwaye benshi, numvaga ubuzima bwanjye buri mu mwijima. Naje rero gusaba akazi ko kurera imfubyi barakampa ariko nari mfite intimba ikomeye ku mutima narihereraga nkarira, agahinda nkakarangiriza mu cyumba narangiza nkaza nkarera abana nkabahoza nkabahumuriza. Ntibyari byoroshye ariko abayobozi ba SOS bagiye bamba hafi bakangira inama.”

Nyirahabineza w’imyaka 50 y’amavuko ntiyigeze ashaka umugabo nta n’umwana yabyaye ariko aterwa ishema n’abana yareze babaye abagabo n’abagore, bamwita ‘Mama’ ndetse ngo iyo babyaye ajya kubahemba nabo bakamuzanira abuzukuru.

Umwana muto mu bo Nyirahabineza arera yatangiye kumurera afite amezi abiri
Bamwe mu bana barezwe na Nyirahabineza
Nyirahabineza Mathilde yanze gushaka umugabo ahitamo kurera imfubyi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza