Intego za Bizimana, umutetsi wa Kigali Marriott Hotel wegukanye kimwe mu bihembo bikomeye mu Karere

Yanditswe na IGIHE
Kuya 18 Ugushyingo 2019 saa 08:19
Yasuwe :
0 0

Umutetsi wa Kigali Marriott, Jean Baptiste Bizimana, wegukanye umwanya wa gatatu muri Gorilla Highland Silver Chef 2019, yatangaje ko ubutetsi ari akazi yiyumvamo kandi yizeye ko kazamugeza kure.

Bizimana ufite impano ikomeye yo guteka, ubu akora Kigali Marriott Hotel. Mu gikorwa cyahuje abatetsi baturutse mu bihugu bitandukanye yishimiye kuza ku mwanya wa gatatu mu karere byamushyize mu mwanya ukomeye nyuma yo gutsinda abo bari bahatanye bavuye mu Rwanda, muri Repubulika Iharanira Demokarasi ya Congo na Uganda.

Bizimana yagiye muri Kigali Marriott Hotel nk’umutetsi kuva muri 2017. Icyo gihe bari bashyize ingufu mu byo bakoraga ku rwego rukomeye mu gutegura indyo nziza.

Ashimira Kigali Marriott Hotel kuba yaramufashije kugera kuri uru rwego, akavuga ko adateze guhagarara kugera inzozi ze zibaye iz’umunyarwanda umeze nka Gordon Ramsay. Uyu ni umutetsi mpuzamahanga ukomeye ukomoka mu Bwongereza.

IGIHE yagiranye ikiganiro na Bizimana avuga ku rugendo rwe n’aho yavanye ubwo bushake bwatumye agera aho ari uyu munsi.

Yagize ati “ Na mbere nagiye ngira icyifuzo cyo kuzaba umutetsi ukomeye ubwo nari nkiri muto, njye n’umuryango wanjye umunsi umwe twagiye gusangira ifunguro muri Hotel Mille Collines aba ari naho mbona umutetsi bwa mbere waje akatubaza ubumenyi dufite ku biryo, ako kanya nakuruwe n’uburyo ameze, ingofero ndetse n’ishati nziza y’umweru yari yambaye (ukabona aranasekamo gake), Narishimye cyane kuva aho nibwo igitekerezo cyaje muri njye numva ari byiza.”

Bizimana avuga ko nyuma yo gusoza amashuri yisumbuye, yahise ajya kwiga mu ishuri ryigisha ubutegetsi rizwi nka Kagarama Culinary School, aba ariho amara imyaka itatu yose mu bijyanye n’ubutetsi.

Ati “Nsoje aya masomo, nabonye akazi muri Karisimbi Hotel aho nakoze imyaka itanu nubaka ubumenyi bukomeye. Nyuma nibwo nagiye muri Serena Hotel nk’umuyobozi w’abatetsi wungirije, ibi byanyongereye ubumenyi.”

Mu 2017 ubwo Kigali Marriott Hoteli yari imaze gufungura mu Rwanda, Bizimana yasabye kuba yayikoramo ako kanya ahabwa akazi nk’umutetsi nabwo wungirije.

Avuga ko icyo gihe yagize amahirwe yo kubona ubumenyi no gukorana n’abandi mu birori bitandukanye, bituma akomeza kubyishimira.

Ku bijyanye n’ibiryo akunda guteka, Bizimana avuga ko akunda ibizwi nka Indian food. Ati “Ubwo nazaga muri Kigali Marriott abayobozi banjye bagiye banyerekera uko bateka ubu bwoko, nahise mba umukunzi wabyo, cyane cyane ibyitwa ‘Chicken Biryani’.

Yavuze ko akunda n’ibiryo bya gakondo birimo ihene ivanze n’ibitoki, aya akaba ariyo mahitamo ye ya mbere igihe icyo aricyo cyose.

Ku bijyanye n’igihembo yatsindiye n’icyatumye agira ubushake bwo kwitabira amarushanwa, Bizimana yavuze ko byatewe n’uko no mu 2018, hari mugenzi we wo muri Kigali Marriott Hotel wari wacyegukanye.

Ati “Nari hano mu gihe cyashize ubwo aya marushanwa yabaga mu 2018, cyari cyakiriwe na Kigali Marriott Hotel, icyo gihe umwe mu batetsi bacu witwa Sindayigaya yaritabiriye ndetse aza kugitsindira mu karere aza ku mwanya wa mbere, nibwo nibwiye ko nshaka kujyamo.”

Avuga ko aribwo yafashe icyo cyemezo cyo kwiyandikisha muri aya marushanwa, abifashijwemo nabwo na Kigali Marriott Hotel.

Ati “Nize byinshi muri aya marushanwa, narushijeho kugira umuvuduko mu byo nkora, guhura n’abandi batetsi bo muri RDC, Uganda ndetse mbona n’ubundi bumenyi bwo gutanga ibiribwa.”

Avuga ko kuba muri batatu ba mbere bo muri Gorilla Highland Silver Chef 2019, aho yanabonye impamyabushobozi nk’umutetsi mwiza mu Rwanda, muri Uganda no muri RDC bizamufasha cyane mu kazi ke.

Ku bijyanye n’uko umuryango we waba umufasha gukunda akazi ke, Bizimana yagize ati “Umuryango wanjye ni wo nimero ya mbere mu kumfasha, baransengera, baramfasha cyane kandi baranyishimira, yaba umugore wanjye ndetse n’abana banjye.”

Naho ibijyanye n’uko iyo ari mu rugo yaba afata akanya agateka cyangwa abiharira umugore, Bizimana avuga ko akunda gutekera umuryango we mu gihe atakoze, kandi ko aba yumva ari ibintu yakora buri munsi ariko biterwa n’uko agira umwanya muto.

Bizimana agaragaza ko inzozi ze ari ukuba umutetsi w’icyitegererezo, nka Gordon Ramsay. Yifuza kuba nka we cyangwa akaba yarenzaho kandi akaba yafasha abandi gukora neza mu kazi kabo.

Yavuze ko kandi yumva rimwe azajya akora ikiganiro kuri Televiziyo kigaragaza igikoni cyiza ndetse akigisha abandi batetsi bafite uwo muhamagaro.

Umutetsi wa Kigali Marriott, Jean Baptiste Bizimana, wegukanye umwanya wa gatatu muri Gorilla Highland Silver Chef 2019
Bizimana akunda guteka indyo y'abahinde yitwa Chicken Biryani
Afite inzozi zo kuzajya akora ikiganiro kuri Televiziyo kigaragaza igikoni cyiza ndetse akigisha abandi batetsi bafite uwo muhamagaro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza