Faustin Kagame, inzu y’ibitabo y’u Rwanda washize amanga akavuga ku burwayi bwe bwa Alzheimer

Yanditswe na IGIHE
Kuya 17 Ugushyingo 2019 saa 11:54
Yasuwe :
0 0

Akenshi usanga abantu barwaye indwara zikomeye badakunda ko bimenyekana muri rubanda kubera impamvu zitandukanye ahanini zirimo kuba baba baramaze kwiheba, babarira iminsi ku ntoki, ariko kuri Faustin Kagame si uko!

Uyu mugabo ubitse amateka ahambaye y’u Rwanda mu bihe bikomeye rwanyuzemo byose, yakoze imirimo itandukanye mu myaka 72 amaze ku Isi.

Magingo aya, Faustin Kagame wabaye Umujyanama w’Umukuru w’Igihugu arwaye Alzheimer itera umuntu kwibagirwa. Ubu burwayi kuri Faustin Kagame, ni igihombo gikomeye ku Rwanda bigendanye n’ubumenyi yibitsemo mu myaka yose ye y’ubuzima bwe, aho yafatwaga nk’inzu y’ibitabo y’agaciro y’u Rwanda.

Faustin Kagame ni uwo mu muryango umwe na Padiri Alexis Kagame nawe wanditse amateka akomeye mu Rwanda nk’umunyamateka uhambaye uko ibihe byagiye bisimburana.

Faustin yavutse ku wa 15 Gashyantare 1947 mu Majyaruguru y’u Rwanda ahahoze hazwi nka Ruhengeri. Se yitwaga Faustin Kabano, yari umuntu uzwi cyane muri icyo gihe.

Padiri Alexis Kagame wavukanaga na nyina, Pascasie Kabogora, ni umwe mu bitabiriye ibirori by’umunsi w’ivuka rya Faustin Kagame. Mu gushaka guha icyubahiro Padiri Alexis Kagame witabiriye uwo munsi mukuru, ababyeyi bahisemo kumwitirira uruhinja rwari rumaze kuvuga, maze yitwa Faustin ‘Kagame’ atyo!

Faustin yari afite imyaka 12 ubwo u Rwanda rwatangiraga kwinjira mu bihe bibi byaganishije no kuri Jenoside yakorewe Abatutsi muri Mata 1994. Mu 1959, umuryango we ni umwe mu yameneshejwe mu gihugu izira ko ari Abatutsi.

Ababyeyi be bahungiye muri Uganda gusa Faustin arasigara aho yoherejwe i Butare muri Kaminuza akitabwaho na Padiri Alexis Kagame aho ngo yamubereye mama na papa icyarimwe.

Aho ni ho yigiye amateka y’u Rwanda ya mbere y’ubukoloni ayigishijwe na Alexis Kagame, amenya atyo byinshi ku banyarwanda kuva ubwo kugeza magingo aya.

Ibihe bye mu buhungiro

Nyuma yaje guhungira mu Burundi mu 1963, nyuma akomereza muri ‘Union Soviétique’ [u Burusiya bw’ubu]. Yize muri Kaminuza yitiriwe Patrice Lumumba; mu Bubiligi, muri Congo-Brazzaville no mu Busuwisi.

Niho yavuye mu ntangiriro za 1994 yiyunga ku basore n’inkumi bari bakereye kubohora u Rwanda bari ku Mulindi wa Byumba, aherekeza abasirikare 600 ba FPR Inkotanyi bari berekeje ku Nteko Ishinga Amategeko ku Kimihurura gushyira mu bikorwa amasezerano ya Arusha.

Ku wa 7 Mata, Jenoside yakorewe Abatutsi yatangiye ari muri Kigali mu nyubako y’Inteko Ishinga Amategeko, aho yaboneye ubugome ndengakamere yakoranywe. Icyo gihe yakoreraga ikinyamakuru cyo mu Busiwisi, Hebdo, aho yanditse urupfu rw’agashinyaguro abatutsi bicwaga mbere y’uko ahungira mu gace kagenzurwaga na FPR.

Iminsi ni mitindi, nta we ujya inama n’ubuzima

Faustin Kagame ni umwe mu bagabo wabaza amateka yo mu bihe bitandukanye by’u Rwanda akayakubwira neza kurusha undi uwo ariwe wese. Ni umugabo kandi uvuga ashize amanga, akagaragaza ikimuri ku mutima. Gusa magingo aya, ubuzima bwe ntibuhagaze neza.

Bitewe n’ubuzima yanyuzemo, yubatse umubano ukomeye hagati ye n’abandi bantu benshi, ibintu bigarukwaho cyane na Medhi Ba, Umwanditsi Mukuru wa Jeune Afrique dukesha iyi nkuru.

Medhi agaragaza uburyo Faustin Kagame ari umwe mu bantu b’abahanga yamenye ku bijyanye n’amateka y’u Rwanda. Yanditse ko ku wa 05 Ugushyingo yamwandikiye ku rukuta rwa Facebook ye ko u Rwanda rukwiye guhanga umwanya mushya wa Minisiteri y’Amateka hanyuma [Faustin Kagame] akayiyobora.

Ati “Naravuze nti u Rwanda rukwiye guhanga Minisiteri y’amateka. Nkubona nk’umuntu wayibera umuyobozi wa mbere. Ndavuga amateka muri rusange. Y’abantu bazi iby’ahahise, ahuza n’abakurambere bavuga amateka uko ari.”

Nyuma y’iminsi umunani nyuma y’ubwo butumwa, Medhi Ba yavuze ko yaguye mu kantu, umutima we ukenda guhagarara ubwo yamenyaga ko umwe mu bantu b’ingenzi babumbatiye amateka y’u Rwanda, Faustin Kagame, arwaye Alzheimer.

Yabimubwiye mu mvugo igaragaza ko nta gikuba cyacitse, yumvikana nk’umuntu utihebye.

Medhi ati “Mu gihe njye amarangamutima yari akomeje kunsaba, nabuze aho nkwira, yongeyeho ati “murumuna wanjye - niko yakundaga kunyita, ndashaka ko ubivugaho.”

Faustin Kagame yarenze ibifatwa nk’imiziro mu Banyafurika byo guhisha indwara barwaye yemera ko ivugwa.

Umwanditsi wo muri Mali, Amadou Hampâté Bâ, mu 1960 ubwo yari mu Nteko Rusange ya Unesco yavuze ko muri Afurika umusaza upfuye ari nk’inzu y’ibitabo ihiye. Medhi ashima Imana ko Faustin akiri muzima ariko ko inzu y’ibitabo imurimo igenda ifatwa n’umuriro gahoro gahoro.

Akomeza avuga ko ugendeye ku mateka y’uyu mugabo, akwiye kwandikwaho igitabo kivuga ku buzima bwe cyangwa se agakorwaho filimi.

Mehdi Ba wahishuye uburwayi bwa Faustin Kagame, ni umwanditsi mukuru w’urubuga rwa internet rwa Jeune Afrique. Yabaye umukozi wayo muri Sénégal, aho yatangazaga amakuru yo mu Burengerazuba bwa Afurika (Mauritanie, Gambie, Guinée-Bissau, Mali) ndetse nyuma yakoreye mu Rwanda no mu Burundi.

Umva ikiganiro Faustin Kagame yagiranye na Eugene Anangwe mu 2015 kuri Contact TV

Mu 2017, Faustin Kagame yavuze ku buzima bwe mu kiganiro Le Miroir kuri RBA

Faustin Kagame wamenyekanye cyane nk'umunyamakuru, ni umwe mu bantu bazi amateka y'u Rwanda mu bihe bitandukanye rwanyuzemo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza