00:00:00 IGIHE NETWORK KN KINYARWANDA EN ENGLISH FR FRANCAIS

Bikomeye wafashijwe na Perezida Kagame kujya kwiga muri Amerika yatangiye kwitura abandi ineza yagiriwe

Yanditswe na Iradukunda Serge
Kuya 26 Gicurasi 2021 saa 10:11
Yasuwe :
0 0

Bikomeye Jean Chrysostome ni Umunyarwanda ukomoka i Karimbu, umwe mu Midugudu igize Akagari ka Mutenderi mu Murenge wa Mutenderi mu Ntara y’Iburasirazuba.

Uyu mugabo wiga amasomo y’Ubuganga muri Medical College of Wisconsin, amashuri abanza yayize mu Rwunge rw’Amashuri rwa Bare (GS Bare).

Bikomeye yagiye kwiga muri Amerika mu 2008, amasomo ye ayatangirira muri Kaminuza ya William Penn, iherereye mu Mujyi wa Oskaloosa, muri Leta ya Iowa.

Kimwe n’abandi bantu benshi bavukiye kandi bakanakurira mu bice by’icyaro hirya no hino mu Rwanda, kwizihiza isabukuru y’amavuko ntabwo ari ibintu byari bimenyerewe kuri Bikomeye akiri muto. Ngo uyu muco yamenye ko ubaho mu 2009, ubwo yari amaze umwaka agiye kwiga muri Leta Zunze Ubumwe za Amerika.

Kubera gusobanukirwa ingaruka z’icyorezo cya COVID-19 cyane cyane ku bantu bafite ubushobozi buke n’abadafite epfo na ruguru, Bikomeye yahisemo gufasha abanyeshuri bo ku ivuko rye, nk’uburyo bwo kwizihiza isabukuru ye y’amavuko mu 2021.

Ni muri urwo rwego Bikomeye yashakishije inkunga y’amafaranga, atangiza ubukangurambaga ku rukuta rwe rwa Facebook bugamije gukusanya amafaranga yafasha abanyeshuri biga kuri GS Bare kubona ifunguro rya saa Sita mu kwezi kumwe.

GS Bare ni ishuri ry’uburezi bw’ibanze bw’imyaka 12 ryigamo abanyeshuri 1310 mu Murenge wa Mutenderi. Iri shuri rigabura ifunguro rya saa Sita ku banyeshuri bagera kuri 500, ariko bigoranye kubera ubushobozi buke bw’ababyeyi.

Icyorezo cya COVID-19 cyatumye ubukene bwiyongera mu miryango itishoboye, kandi abana 200 mu banyeshuri 500 bagaburirwa saa Sita, nta bushobozi bafite bwo kubona 4000 Frw y’ifunguro rya saa Sita rya buri kwezi. Kubera ukwiyongera kw’ibiciro ku isoko, aya mafaranga yariyongereye agera kuri 5000 Frw guhera muri iki gihembwe nk’uko ubuyobozi bw’ishuri bubivuga. Bivuze ko bizagora ababyeyi kurushaho.

Nyuma yo kumenya ibi, mu ntangiriro za 2020 Bikomeye yatangije ubukangurambaga kuri Facebook aho yasabaga abantu kwitanga uko bashoboye kugira ngo bafashe abana batishoboye biga kuri iki kigo kubona ifunguro. Muri ubu bukangurambaga Bikomeye yakusanyije 850.000 Frw.

Mu rwego rwo gushaka uburyo burambye bwo kugaburira abana ifunguro rifite imbuto n’imboga byera muri ako gace, 30% ya 850.000 RWF yakusanyijwe azashorwa mu mushinga wo guhinga imboga ku bufatanye na Koperative y’abagore yitwa “Twite Ku Buzima”. Naho 70% asigaye yashyikirijwe ishuri kugira ngo agaburire abana batishoboye 60 iki gihembwe cyose.

Bikomeye yavuze ko yakusanyije 850.000 Frw abifashishijwemo n’inshuti ze ndetse asaba abandi gutekereza bakareba icyo bashobora gufasha abatishoboye ngo kuko ariwo murage mwiza wo gusiga.

Ati "Gushyigikirana ni imwe mu ndangagaciro z’umuco Nyarwanda. Nifashishije inshuti zanjye zo kuri Facebook kugira ngo mbashe gufasha abatishoboye nk’abana mwabonye uyu munsi. Abenshi dukunda ibirori by’amavuko bidasanzwe kandi bihenze. Ariko dutekereze ubundi buryo busiga umurage mu bantu, twakubaka kurushaho ejo hazaza."

"Aya mafaranga turamutse tuyakoresheje mu bindi bintu nko gufasha abatishoboye, yakora byinshi. Ashobora kugaburira abanyeshuri barenga igihumbi, cyangwa se kwishyurira abakene “Ubwisungane mu kwivuza cyangwa gukemura ibindi bibazo by’imibereho bishobora guhindura ubuzima bwa benshi.”

Bikomeye yavuze ko afite intumbero zo kwagura iyi gahunda ikazagera kure ndetse agatanga umusanzu we muri gahunda ya Leta yo kugaburira abana ku mashuri. Akabikora mu rwego rwo kuzirikana neza yagiriwe n’ubuyobozi bw’igihugu burangajwe imbere na Perezida Kagame.

Umuyobozi wa G S Bare, Padiri Maniraho Jean Damascène, yavuze ko nubwo iyi nkunga Bikomeye yahaye iri shuri ari iy’ukwezi kumwe ko izafasha abanyeshuri batishoboye bagorwaga no kubona ifunguro rya Saa Sita.

Ati "Iyi nkunga itanga agahenge nibura igihe cy’ukwezi kumwe ku bana batishoboye. Ibi rwose bizamura imitsindire y’abo bana bari baratewe ipfunwe n’ikimwaro byo guhabwa ifunguro ritanzwe n’abandi babyeyi. Ifunguro ry’ukwezi kumwe rishobora gufatwa nk’igitonyanga cy’imvura mu butayu, ariko ku gikorwa nk’iki siko bimeze. Kuba Bikomeye yaratekereje ku bana ubwabyo ni iby’agaciro gakomeye cyane kandi hari icyo byakigishije abandi bantu bifite."

Bikomeye ni umwe mu banyeshuri b’abahanga bahawe buruse na Perezida Paul Kagame yo kujya kwiga muri Amerika mu 2008. Yabaye umunyeshuri wa mbere kuri William Penn University, ubwo yaharangizaga mu 2012, umuhango Perezida Paul Kagame yitabiriye nk’umushyitsi w’icyubahiro ndetse akanahabwa impamyabumenyi y’ikirenga y’icyubahiro izwi nka ’Doctorate of Humane Letters’ kubera uruhare yagize mu kubaka u Rwanda nyuma ya Jenoside yakorewe Abatutsi mu 1994.

Bikomeye ubu akomeje amasomo yo ku rwego rw’ikirenga mu bijyanye n’ubuzima rusange muri “Medical College of Wisconsin” muri Amerika. Hamwe n’umujyanama we Dr. Kirsten Beyer, Bikomeye akora ubushakashatsi butandukanye bw’ibanze ku isano iri hagati y’imihindagurikire y’ikirere n’ubuzima muri rusange. Ubushakashatsi bwe buganisha ku kureba inyungu zo guhangana n’imihindagurikire y’ikirere n’ibyiza bigira ku buzima bwa muntu.

Zimwe mu nyandiko ze z’ubushakashatsi yashyize hanze “research publications” zibanda ku byiza byo kwita ku bidukikije ku buzima bw’abantu mu kurwanya indwara zidakira nka kanseri cyangwa se indwara z’umutima.

Umubyeyi wa Bikomeye, ashyikiriza Umuyobozi wa G S Bare, Padiri Maniraho Jean Damascène, amafaranga umuhungu we yageneye abanyeshuri batishoboye ngo bajye babona ifunguro rya saa Sita
Igice kimwe cy'aya mafaranga cyahawe koperative izajya ifasha iki kigo cy'amashuri kubona imboga n'imbuto
Amwe muri aya mafaranga azashorwa mu mushinga wo guhinga imboga n'imbuto ku bufatanye na Koperative y'abagore bo muri aka gace yitwa “Twite Ku Buzima”
Aha Bikomeye yasuhuzanyaga na Perezida Kagame wari witabiriye umuhango wo gutanga impamyabumenyi muri William Penn University, hari mu 2012
Bikomeye yarangije amasomo ari umwe mu banyeshuri bafite amanota meza
Bikomeye na bagenzi be bafashe ifoto y'urwibutso na Perezida Kagame

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .