Amwe mu magambo ya Oprah Winfrey utaraciwe intege n’ubuzima bushaririye yakuriyemo

Yanditswe na Mukaneza M.Ange
Kuya 13 Werurwe 2017 saa 01:23
Yasuwe :
1 0

Oprah Winfrey ni umwe mu bagore b’ibyamamare ku isi kandi bavuga rikijyana, yigaruriye imitima y’abatari bake binyuze mu biganiro bitandukanye akora kuri radio na televiziyo.

Winfrey wavukiye muri Leta ya Mississippi, imwe mu zigize Leta Zunze Ubumwe za Amerika (US) mu 1963, abarirwa mu baherwe ku isi aho afite umutungo ungana na miliyari eshatu z’amadorali.

Nubwo kuri ubu abayeho neza, ndetse benshi bamufata nk’icyitegererezo, Oprah yakuriye mu buzima bushaririye aho yarerwaga na nyina gusa, na we wakoraga akazi ko mu rugo.

Afite imyaka icyenda yatangiye gufatwa ku ngufu na babyara be, nyirarume n’undi muntu wari inshuti y’umuryango. Ku myaka 14 yatwaye inda, ariko umuhungu we ntiyagira amahirwe yo kubaho kubera kuvuka igihe kitageze.

Uyu mugore wamenye gusoma afite imyaka itatu gusa, yaje kugira amahirwe yo kujya mu ishuri ndetse nyuma aza kwinjira mu mwuga w’itangazamakuru.

Mu 1983 yatangiye gukora ikiganiro cya mu gitondo cyacaga kuri televiziyo ya WLS, kubera gukundwa n’abantu benshi cyahinduriwe izina mu 1986, cyitwa “The Oprah Winfrey Show”. Cyatumye arushaho kumenyekana kuko akenshi yatumiragamo abantu bakomeye.

Ubuzima bugoye yanyuzemo ntiyigeze yemera ko bugena ejo hazaza he; twifashishije imbuga zitandukanye zirimo Entrepreneur twabakusanyirije amwe mu magambo yavuze mu bihe bitandukanye, ashobora gutuma buri wese ahinduka ntatezuke ku cyatuma agera ku ntsinzi.

- Buri wese afite umuhamagaro. Inshingano y’ibanze mu buzima bwawe ni ukumenya hakiri kare icyo uzaba cyo, aho waremewe kuba ndetse ugatangira kubyubaha mu buryo bwiza bushoboka.

- Rimwe na rimwe ntabwo tumenya abo dukwiye kuba bo kubera ko duhugijwe no kugerageza kubaho tugendeye kubitekerezo by’abandi. Ariko burya abandi bantu n’ibitekerezo byabo nta bubasha bifite kuri ejo hacu.

- Urufunguzo rwo kugera ku nzozi zawe ni ugushyira imbaraga ku gaciro kazo kurusha intsinzi. Bizatuma n’intambwe nto, n’intsinzi yoroheje mu rugendo rwawe, igira agaciro gakomeye.

- Ukwiye gusobanukirwa icyazana urumuri mu buzima bwawe, kugira ngo wowe, mu buryo bwawe ubashe kumurikira isi.

- Nemera ko umuntu adafite inshingano yo kugenga ubuzima bwe gusa, ahubwo ko no gukora ibintu byiza uyu munsi, bigushyira aheza mu bihe biri imbere.
- Ntabwo nibona nk’umukobwa wabayeho mu buzima bubi nyuma akabaho neza. Nitekereza nk’umuntu wamenye kuva akiri muto ko agomba kwiyitaho ubwe no gukora byinshi byiza…

- Amahitamo azakugeza ku byiza ahera ku gutondekanya ibitekerezo n’amagambo, mu buryo butuma wumva ko ugomba gukora ibyisumbuyeho.
- Ntabwo nari nziko kuba umwimerere wawe byatuma uba umukire nk’uko nabaye we. Iyo mbimenya, mba narabikoze hakiri kare.

- Kora cya kintu utekereza ko udashoboye gukora. Tsindwa, wongere ugerageze, ubwa kabiri ukore neza kurushaho. Abantu batajya bagwa ni abatagerageza kuzamuka umugozi uri hejuru. Iki ni cyo gihe cyawe, gikoreshe.

- Kubabarira nyabyo ni igihe uvuga uti “Warakoze kunsigira isomo mu buzima”. Kubabarira ni ukureka gutekereza ko ibyatambutse hari ukundi byari kugenda.

- Aho ugeze hose mu rugendo rwawe, nzi neza ko nawe uzakomeza guhura n’ibigeragezo. Ni umugisha kubasha kubitsinda, kubasha gutera intambwe imbere y’indi. Kuba uri aho uzamuka umusozi w’ubuzima, ariko uzi neza agasongero kari imbere. Buri kintu cyose uhura na cyo, ni umwalimu ukomeye.

- Niba inshuti yawe ihora iguhemukira, ku ruhande rumwe ni ikosa ryawe. Umuntu naramuka akweretse ikimenyetso cyo gushaka kwihugiraho, uzabimenye utangira kwiyitaho ubwawe. Abantu ntabwo bazigera bahinduka kubera ko ubyifuza gusa.
- Buri wese aba yifuza kugendana nawe muri Limo (Ubwoko bw’imodoka), ariko uwo ukeneye ni umuntu uzagendana muri bisi igihe Limo yapfuye.

- Inkuru y’ubuzima bwawe niramuka ibaye gukunda abandi, ntabwo hazigera habamo urupapuro rwa nyuma, kuko umurage ukomeza. Utiza urumuri rwawe umuntu umwe, nawe akamurikira abandi benshi. Nzi neza ko ku iherezo ry’ubuzima bwacu, igihe ntabyo gukora tuzaba dufite, nta butumwa twohererejwe, ikizaba gifite agaciro ni ukumenya niba twarakunze abandi cyangwa se bo baradukunze.

Nubwo kuri ubu abayeho neza, ndetse benshi bamufata nk’icyitegererezo, Oprah yakuriye mu buzima bushaririye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza